ଦିନକର
କଥା ।
ପିରାମିଡ଼ ଦେଖିବା
ପାଇଁ ବସଟିଏ ଚାଲିଥାଏ ମିଶରର ଗାଜା ସହର ଅଭିମୁଖେ ମରୁଭୂମି ରାସ୍ତାରେ ।
ବସଟି ଗନ୍ତବ୍ୟ
ସ୍ଥଳରେ ପହଞ୍ଚିଲା କ୍ଷଣି ବସ ଭିତରୁ ଖପଖାପ
ହୋଇ ଓହ୍ଲେଇ ପଡିଲେ ଯାତ୍ରୀଗଣ । ଧାଇଁଗଲେ ବିଶାଳ
ପିରାମିଡ଼ ନିକଟକୁ । ଏବଂ ଲାଗି
ପଡିଲେ ପ୍ରଥମ ଓ ସବୁଠାରୁ ଗୁରୁତ୍ୱପୂର୍ଣ୍ଣ
କାର୍ଯ୍ୟରେ । ବିଭିନ୍ନ ଅଙ୍ଗଭଙ୍ଗୀରେ
ଉଠେଇ ଚାଲିଲେ ଫୋଟୁ । ଫେସବୁକରେ ଛାଡି
ଲାଇକ ମେଞ୍ଚେ ରୁଣ୍ଡେଇବାକୁ ପଡିବ । ନହେଲେ ଏସବୁ
ବୁଲାବୁଲିର ମାନେ କିଛି ନାହିଁ । ଏଇ ସମୟରେ
ଯାତ୍ରୀଙ୍କ ମଧ୍ୟରୁ ବାଳୁଙ୍ଗା ପିଲାଟିଏ ଛୋଟ ରକେଟ ଭଳିଆ ଚାଇନା ଖେଳଣା ଗୋଟେ ଧରି "ପ୍ରବେଶ ନିଷେଧ" ବାଲା ସିକ୍ୟୁରିଟି ଫିତା ତଳେ ଗଳି ସିଧା ଧାଇଁଗଲା ପିରାମିଡ଼ ନିକଟକୁ । ସିକୁରିଟି ବାଲାଙ୍କ
ଆଖିରେ ପଡିବାରୁ ହୁଇସିଲ ଫୁଙ୍କି ପିଲାଟାକୁ ଅଟକାଇବା ପାଇଁ ଦଉଡି ଗଲେ ପିଲାଟାର ପଛେ ପଛେ । ବାଳୁଙ୍ଗା ବାଳକ
ସିକୁରିଟି ବାଲାଙ୍କୁ ଦେଖି ଉଠିଗଲା ପାଖରେ ଥିବା କାଠରେ ଏକ ଅର୍ଦ୍ଧନିର୍ମିତ ଛାମୁଡ଼ିଆ
ଉପରକୁ ।
ନାଁ ନାଁ
କହି ପିଲାଟାକୁ ଅଟକାଇବେ କଣ, ପିଲାଟା ଛାମୁଡ଼ିଆ ଉପରେ ବାଲାନ୍ସ ହରେଇ ଟଳମଳ ହୋଇ ଗଳି ପଡିଲା ପିରାମିଡ଼ ଉପରେ । ଏତେ ଉଚ୍ଚାରୁ
ପଡି ଗୋଡହାତ ଭାଙ୍ଗିବ କଣ ପିଲାଟା ବାଉନ୍ସ
ଖାଇ ଉଠିଗଲା ତାଳଗଛ ଉଚ୍ଚା ଉପରକୁ ଓ ଛିଟିକି ଯାଇ
ପଡିଲା ନିକଟରେ ଫେସବୁକ ପାଇଁ ଫୋଟୁ ତୋଳୁଥିବା ତା ମୋଟୁ ବାପାର
ପେଟ ଉପରେ । ଓଃ.. safe landing.. ଆଶ୍ୱସ୍ତ ।
ହେଲେ ଏପଟେ ଭୁଷୁ ଭୁସୁ ପବନ ସହ ବିଶାଳ ପିରାମିଡ଼ଟା
ଭୁଇଁରେ ଲୋଟିଗଲା ଗୋଟେ ବଡ଼ ପାଲ ପରି । ସିକୁରିଟି ବାଲା
ସାଇକେଲ ପମ୍ପ ଧରି ଦଉଡ଼ିଗଲେ ଓ ପମ୍ପ ମାରି
ଯଥା ଶୀଘ୍ର ପବନ ପୁରେଇ ପିରାମିଡ଼କୁ ଠିଆ କରେଇବାକୁ ଚେଷ୍ଟା କଲେ । ଏଡ଼େ ବିଶାଳ
ପିରାମିଡ଼ କୋଉ ଏ ଫୁଙ୍କା ପବନରେ
ତତକ୍ଷଣାତ ଠିଆ ହେବ ! ପବନ ବେଗରେ ଖେଳିଗଲା ଖବର । ମିଶର ଦେଶର
ବିଶାଳ ପିରାମିଡ଼ ଚୋରି । ଟିଭିରେ ଆସିଲା
ଘନ ଘନ ବ୍ରେକିଂ ନିଉଜ
। ବିଶ୍ୱ ସାରା ହୁଲସ୍ତୁଲ । କିଏ ଚୋରି
କଲା ପିରାମିଡ଼ !! କିଏ ସେ କୁଖ୍ୟାତ ଚୋର
!!
ସବୁଆଡେ
ପିରାମିଡ଼ ଚୋରି ହେବାର ଚର୍ଚ୍ଚା । ଚୋରକୁ ନେଇ
ନାନା କଳ୍ପନା ଜଳ୍ପନା । ଗବର ସିଂହ
(ଶୋଲେ), କୁରୁ ସିଂହ (ଚନ୍ଦ୍ରକାନ୍ତା) ପରେ ଏ ଚୋର ସାରା
ପୃଥିବୀରେ ଏବେ ମୁଖ୍ୟ ଖଳନାୟକ । ଖବର ଯାଇ
ବାଜିଲା Gru ର କାନରେ ।
ତା ସ୍ୱାଭିମାନକୁ ହେଲା ଧକ୍କା । କିଛି ଗୋଟେ
ତୁରନ୍ତ କରିବାକୁ ପଡିବ । ମଇତ୍ର ଡାକ୍ତର
ନେଫାରିଓ ସହ ଭିଡିଓ ଚାଟ
ଟିଏ କରି Gru ଦଉଡିଲା ନିଜ ଗୁପ୍ତ ଚାମ୍ବରକୁ ଯୋଉଠି ଥିଲେ ତାର ହଜାର ହଜାର ମିନିୟନ ସେନା । ଟ୍ୱିଟରରେ ରାଜନୈତିକ
ଦଳଙ୍କ ବଟସେନା ଟ୍ରେଣ୍ଡ କରିବା ଖବର ଶୁଣି ଧାଇଁ ଆସିଲା ପରି, ନିଜ କାମଧନ୍ଦା ଅଧାରୁ ରଖି ଧାଇଁ ଆସିଲେ ମିନିୟନ ସେନା ଖବର ଶୁଣୁ ଶୁଣୁ ।
ସଭା ମଞ୍ଚ ତଳେ ଆସି ଏକାଠି ହେଲେ ସମସ୍ତେ । Gru କଲା ବଡ଼ ଘୋଷଣା । ଏ ନୂଆ
ଚୋରକୁ ବାଜିମାତ ଦେଇ ଆମକୁ ରହିବାକୁ ହେବ ଖବରର ଶୀର୍ଷରେ । ଆମେ ଚୋରି
କରିବା ସବୁଠାରୁ ବଡ଼ ଚୋରି.. ଜହ୍ନ ଓରଫ Moon.
Gru ଜଣେ
ଖ୍ୟାତନାମା ଭିଲିୟାନ । ଲମ୍ବା ନାକ,
ପତଳା ଗୋଡ଼, ଚନ୍ଦା ମୁଣ୍ଡ, ଢିମା ଆଖି ଓ ଘମ ପରି
ଉଦର । ବୁଦ୍ଧି ଓ
ଜ୍ଞାନ କୌଶଳରେ ବେଶ ପାରଙ୍ଗମ । Gru ର ଡାହାଣ ହାତ
ତା ସାଙ୍ଗ ଡାକ୍ତର ନେଫାରିଓ । ଜହ୍ନ ଚୋରି
ଅଭିଯାନ ପାଇଁ ଆରମ୍ଭ ହେଲା ପ୍ଲାନ । ଗୋଟେ "ସଙ୍କୁଚିତ
ଯନ୍ତ୍ର" ସାହାଯ୍ୟରେ ଜହ୍ନକୁ ପ୍ରଥମେ ସଙ୍କୁଚିତ କରି ଛୋଟ କରାଯିବ । ତାପରେ ଟେନିସ
ଖେଳାଳି ହାଫ ପେଣ୍ଟ ପାକିଟିରେ ଟେନିସ ବଲ ଦୁଇ ଚାରିଟା
ରଖିଲା ପରି ଜହ୍ନକୁ ପାକିଟିରେ ପୁରେଇ ଘରକୁ ନେଇ ଆସିହେବ । ହେଲେ ଜହ୍ନ
ପାଖକୁ ଯିବା ପାଇଁ ରକେଟ ତିଆରି ପାଇଁ ଆବଶ୍ୟକ ଅନେକ ଗୁଡ଼ାଏ ଅର୍ଥ । "ଚୋର ମାନଙ୍କ ବ୍ୟାଙ୍କ" ର ମ୍ୟାନେଜର ବିନା
ପ୍ରମାଣପତ୍ରରେ ଟଙ୍କା ଦେବାକୁ ସଫା ସଫା ମନା କରିଦେଲା । ଆଜି "ସଂକୁଚିତ
ଯନ୍ତ୍ର" ଦେଖାଅ, ତା ପରେ ମିଳିବ
ଟଙ୍କା ।
ସଙ୍କୁଚିତ
ଯନ୍ତ୍ରଟି ଥାଏ ପିରାମିଡ଼ ଚୋର ଭିକ୍ଟରର ଘରେ । ଭିକ୍ଟର ବି
ଚୋର ବୁଦ୍ଧି ଓ ଜ୍ଞାନ କୌଶଳରେ
କିଛି କମ ନୁହେଁ ।
Gru ଶତ ଚେଷ୍ଟା କରି ମଧ୍ୟ ଭିକ୍ଟରର ସିକ୍ୟୁରିଟି ଭେଦ କରି ତା ଘରୁ ଯନ୍ତ୍ରଟି
ଚୋରି କରି ଆଣି ପାରିଲା ନାହିଁ । ବାରମ୍ବାର ଚେଷ୍ଟା
କରି ଫେଲ ମାରିଲା ପରେ ଦିନେ Gru ଦେଖିଲା, ତିନୋଟି କୁନି ଝିଅ ବିସ୍କୁଟ ବିକିବା ପାଇଁ ଭିକ୍ଟର ଘରକୁ ଯାଉଛନ୍ତି । Gru ସ୍ଥିର କଲା ଏଇ କୁନି ଝିଅ
ମାନଙ୍କୁ ହାତବାରିସୀ କରିବାକୁ ହେବ । ଠିକଣା ନେଇ
ବୁଝିଲା ଯେ ଝିଅ ତିନୋଟି
ଗୋଟେ ଅନାଥ ଆଶ୍ରମର । Gru ସେମାନଙ୍କୁ ନିଜ ପୋଷ୍ୟ କନ୍ୟା କରି ଅନାଥ ଆଶ୍ରମରୁ ନିଜ ଘରକୁ ନେଇ ଆସିଲା । ଏପଟେ ବନ୍ଧୁ
ଡାକ୍ତର ନେଫାରିଓ ସହାୟତାରେ ତିଆରି କଲା ବିସ୍କୁଟ ରୋବଟ । ରୋବଟ ଯାହା
ଦେଖିବାକୁ ବିସ୍କୁଟ ଭଳି ହୋଇଥିବେ ଠିକ ଯେମିତି ରାଜନୈତିକ ଦଳମାନେ ନିଜ କାମ ପାଇଁ ତିଆରି କରନ୍ତି ଟ୍ୱିଟରରେ ବଟ ମଣିଷ ।
କୁନି
ଝିଅ ତିନୋଟିଙ୍କ ବିସ୍କୁଟ ପ୍ୟାକେଟରେ ବଟ ବିସ୍କୁଟ କିଛି
ରଖି ଭିକ୍ଟର ଘରେ ପହଞ୍ଚାଇ ଦିଆଗଲା । ବଟ ବିସ୍କୁଟ
ଭିକ୍ଟରର ସିକ୍ୟୁରିଟି କଳ ଅକାମି କରିଦେଲେ
ଭିତର ଆଡୁ । Gru ନିଜର କିଛି ମିନିୟନସଙ୍କୁ ଧରି ଭିକ୍ଟର ଘରୁ ଫାଇନାଲି ସଙ୍କୁଚିତ ଯନ୍ତ୍ରଟି ଆଣିବାକୁ ସକ୍ଷମ ହେଲା ।
ହେଲେ
Gru କଣ ଚୋରି କରିବାକୁ ସକ୍ଷମ ହେଲା ଜହ୍ନକୁ ! ଭିକ୍ଟର କଣ ହାତରେ ହାତ
ଧରି ବସି ରହିଲା? କାମ ସରିଗଲା ପରେ Gru କଣ ପୁଣି ଛାଡିଦେଲା
ଅନାଥ ଆଶ୍ରମରୁ ଆଣିଥିବା ତିନି କୁନି ଝିଅଙ୍କୁ !
ସବୁ
କିଛି ଜାଣିବା ପାଇଁ ନିଜେ ଦେଖନ୍ତୁ Despicable Me ର ପ୍ରଥମ ଭାଗକୁ
। ସପରିବାର ସହ ।
