ନିଧି ଅଜାର ଆତ୍ମକାହାଣୀ

ପୂର୍ବ କମ୍ପାନୀରୁ resignation ଦେଇ ନୋଟିସ ପିରିୟଡ଼ରେ ଥାଏ । ନୋଟିସ ପିରିୟଡ଼ର ଅନ୍ତିମ ଦୁଇ ସପ୍ତାହ  । ବିଶେଷ କିଛି କାମ ନଥାଏ । ଏଇ ଫାଙ୍କା ସମୟରେ ଏମିତି ଏକ ଖିଆଲ ଆସିଲା, ଯାହା ପରବର୍ତ୍ତୀ ସମୟରେ ନିଧି ଅଜା ଚରିତ୍ରକୁ ଜନ୍ମ ଦେଲା । ଟ୍ୱିଟରରେ ଓଡ଼ିଆରେ କିଛି ମଜାଳିଆ ଟ୍ୱିଟ ଲେଖିବା ପାଇଁ ତିଆରି କଲି ଏହି ପ୍ରୋଫାଇଲଟି ।

ଯେ କୌଣସି କାଳ୍ପନିକ କିମ୍ବା parody ପ୍ରୋଫାଇଲ କଲାବେଳେ ଏହାର ନାମକରଣ ବେଶ୍ ଗୁରୁତ୍ୱ ବହନ କରିଥାଏ  । ସ୍ଥିର କଲି profile ଟିର ନାଁ ଏମିତି ଏକ ଓଡ଼ିଆ ଚରିତ୍ର ଉପରେ ରଖିବି ଯାହାକୁ ନେଇ ଭବିଷ୍ୟତରେ କୌଣସି ବିବାଦ ସୃଷ୍ଟି ହେଉନଥିବ ଏବଂ ସବୁ ବର୍ଗର ଲୋକେ ବିନା ଦ୍ଵିଧାରେ follow କରିପାରୁଥିବେ । ତେଣୁ ଚିରାଚରିତ ପ୍ୟାରୋଡି ଏକାଉଣ୍ଟ ବଦଳରେ ଆମ ପିଲାବେଳର କାଳ୍ପନିକ ଚରିତ୍ର ନିଧି ବୁଢାକୁ ବାଛିଲି । ଯେହେତୁ ନିଧି ବୁଢ଼ା ନାଁ'ଟା ଟିକେ ଶ୍ରୁତିକଟୁ ଥିଲା ତେଣୁ ନାଁ'ରେ ଟିକେ ପରିବର୍ତ୍ତନ କରି ନିଧିଅଜା ରଖିଦେଲି । ପ୍ରଥମେ ଲକ୍ଷ୍ୟ ଥିଲା, ସାମ୍ପ୍ରତିକ ପରିସ୍ଥିତିକୁ ନେଇ କିଛି ମଜା ମଜା କଥା ପୁରା ଖାଣ୍ଟି କଥିତ ଓଡ଼ିଆରେ ଟ୍ୱିଟ କରିବି । କ୍ରମେ ଏହା ସହିତ ଛୋଟ କବିତା ସବୁ ଯୋଡିଲି ।

ଅନେକ ଯୁବ ବର୍ଗ ତତକ୍ଷଣାତ ଏ ଏକାଉଣ୍ଟକୁ ପସନ୍ଦ କରିବା ଆରମ୍ଭ କରିଦେଲେ । କିଛି ଓଡ଼ିଆ ଟ୍ରେଣ୍ଡ (ଯଥା ପଖାଳ ଦିବସ, ଉତ୍କଳ ଦିବସ ଇତ୍ୟାଦି) ସହାୟତାରେ ଏ ଏକାଉଣ୍ଟ ପହଞ୍ଚିଲା ଅନେକ ଓଡ଼ିଆଙ୍କ ସାମନାରେ । ଏବଂ ଏଇଠୁ ଆରମ୍ଭ ହେଲା ନିଧିଅଜାର ବିଧିବଦ୍ଧ ଯାତ୍ରା ।

ମଝିରେ କୌଣସି ଏକ ବ୍ୟକ୍ତିଗତ କାମରେ ଏତେ ବୀତସ୍ପୃହ ହୋଇଯାଇଥିଲି ଯେ, ଏ profileକୁ ବନ୍ଦ କରି ନିଜ ଦୈନନ୍ଦିନ କାମରେ ମନ ଦେବାକୁ ଭାବିଥିଲି । କିନ୍ତୁ ସେତେବେଳକୁ ଏ ନିଧିଅଜା ପ୍ରୋଫାଇଲ ମୋର ଆଉ ବ୍ୟକ୍ତିଗତ ସମ୍ପତ୍ତି ହୋଇନଥିଲା । ଅନେକ ବନ୍ଧୁ ମାନଙ୍କ ଅନୁରୋଧ କ୍ରମେ ପୁଣି ଫେରିଲି । ପୁଣି ଚାଲୁ ରହିଲା ନିଧି ଅଜାର ଟ୍ୱିଟ ଧାରା ।

ଯେହେତୁ ଓଡ଼ିଆ ଟ୍ୱିଟର userଙ୍କ ସଂଖ୍ୟା ବହୁତ କମ୍, ଅନେକ ବ୍ୟକ୍ତି ଏହା ମଧ୍ୟରେ ଜାଣିସାରିଛନ୍ତି କିଏ ଏ ଏକାଉଣ୍ଟ ପଛର ଲୋକ । ଅଧିକାଂଶ ଏପର୍ଯ୍ୟନ୍ତ ଜାଣି ନାହାନ୍ତି । ଅନେକ ବନ୍ଧୁ ଜାଣିବା ପାଇଁ ଅନୁରୋଧ କରିଛନ୍ତି । ହେଲେ ମୁଁ ନିଜେ ଦ୍ୱନ୍ଦ୍ୱରେ । କାରଣ ନିଧି ଅଜା ସହ ମୋର ବ୍ୟକ୍ତିଗତ ସାମଞ୍ଜସ୍ୟ କିଛି ବି ନାହିଁ । ଅସଲ ପରିଚୟ ଜାଣିଲେ ବି ମୋ ଠାରୁ ନିଧିଅଜା ପରି କିଛି quality ପାଇବା କଷ୍ଟ ହୋଇଯିବ । ପିଲାବେଳେ କେତେବେଳେ କେମିତି ଗପ ଲେଖୁଥିଲି । କୌଣସି ଗପ ଲେଖିଲା ବେଳେ ମୁଁ ନିଜେ ନିଜକୁ ସେ ଚରିତ୍ରଟି ବୋଲି ଭାବି ଗପ ଲେଖେ । ଏମିତିକି ଲେଖିଥିବା କିଛି ଗପର ମୁଖ୍ୟ ଚରିତ୍ର ନାରୀ ମଧ୍ୟ ଥିଲେ । ତେଣୁ ଅଜା ଚରିତ୍ର ପାଇଁ ବେଶୀ କଷ୍ଟ କରିବାକୁ ପଡିଲାନି । ଜେଜେ, ଅଜା କିମ୍ୱା ଗାଁ'ର ବୟସ୍କ ମାନଙ୍କ କଥାବାର୍ତ୍ତା, ଚାଲିଚଳନକୁ ଟିକେ ନିରେଖି ମନେ ପକାଇଲେ, ଏ ଚରିତ୍ର ଗତିଶୀଳ ହୋଇଯାଏ ଆପେ ଆପେ  ।

ଆଜି ଏତେ ସବୁ କହିବାର କାରଣ କଣ !

2016 ର ଶେଷ ରାତି । ଭାବିଲି ନୂଆ ବର୍ଷ ପାଇଁ କଣ ଦି ଧାଡି ଲେଖିବି ବୋଲି । କିଛି ମୁଣ୍ଡକୁ ଜୁଟିଲାନି ତେଣୁ ଏସବୁ ଲେଖୁଛି ।

ଶେଷରେ

ସମସ୍ତଙ୍କୁ ନୂଆ ବର୍ଷର ଅଭିନନ୍ଦନ । ପ୍ରଭୂ ଜଗନ୍ନାଥଙ୍କ କୃପାରୁ ସଭିଙ୍କ ପାଇଁ ନୂଆ ବର୍ଷ ମଙ୍ଗଳମୟ ହେଉ ।