ଫିଲ୍ମ ରିଭ୍ୟୁ - Some like it Hot

1959 ରେ ରିଲିଜ ହୋଇଥିଲା ଫିଲ୍ମଟି । ଏ ଫିଲ୍ମଟି ବି ଆମ ପୂର୍ବ ଫିଲ୍ମ ଗୁଡିକ ଭଳି କଳାଧଳା (b&w) ଫିଲ୍ମ । ଫିଲ୍ମଟି ତଥାପି ଭଲ ଲାଗିବ କାରଣ ଇଏ ଏକ କମେଡି ଫିଲ୍ମ ଓ ଫିଲ୍ମରେ ଅଛନ୍ତି ସେତେବେଳର ଚର୍ଚ୍ଚିତ ଅଭିନେତ୍ରୀ Marilyn Monroe. 

କାହାଣୀ  :

କାହାଣୀ ଆରମ୍ଭ ହୁଏ ଗୋଡ଼ାଗୋଡ଼ି ସିନ୍ ରୁ । ଏକ ଶବ ବୁହା ଗାଡିକୁ ପୁଲିସ ଗାଡି ଅଚାନକ ଫଲୋ କରେ । ପୁଲିସ ଫଲୋ କରୁଥିବାର ଦେଖି ଶବ ବୁହା କଫିନ ଗାଡିଟି ସ୍ପିଡ଼ ବଢାଏ । ପୁଲିସ ଗାଡି ବି ଦ୍ରୁତ କରେ ନିଜ ସ୍ପିଡ଼ । ଆଗେ ଆଗେ କଫିନ୍ ଗାଡି, ପଛେ ପଛେ ପୁଲିସ ଗାଡି । ଏପଟରୁ ଗୁଳି ଛୁଟେ । ସେପଟରୁ ବି ଗୁଳିମାଡ଼ ଆରମ୍ଭ ହୋଇଯାଏ ।  

ଗୋଡ଼ାଗୋଡ଼ି ହୋଇ, ଗୁଳିମାଡ଼ ଖାଇ କଫିନ୍ ବାଲା ଗାଡିଟି ଫାଇନାଲି ନିଜ ପାର୍କିଂ ଏରିଆରେ ପହଞ୍ଚିଯାଏ । ଯଦିଓ ଗୁଳି କିଛି ବାଜି କଫିନରୁ ତରଳ ପଦାର୍ଥ ବୋହି ଚାଲିଥାଏ । ଗାଡିରୁ ଓହ୍ଲାଇ କଫିନ୍ ବାକ୍ସ ଖୋଲିଲା ପରେ ଜଣାପଡେ ଯେ କିଛି ବୋତଲ ଗୁଳିମାଡ଼ରେ ପ୍ରାଣ ହରାଇଛନ୍ତି ।  

କଫିନ୍ ବାକ୍ସରେ ଥିଲା ଗଦାଏ ମଦ ବୋତଲ ।

 

ଏ ହେଉଛି “ମଦ ବ୍ୟାନ” ର ସମୟ । ନିତିଶ କୁମାର ବିହାରରେ ମଦ ବ୍ୟାନ୍ କଲା ପରି ସହରରେ ଲାଗିଥାଏ ମଦ ଉପରେ ରୋକ । ବ୍ୟାନ୍ ର ସଦୁପଯୋଗ କରୁଥାନ୍ତି ସହରର ବଡ଼ ବଡ଼ ଡ଼ନ୍ ଓ ସେମାନଙ୍କ ଗ୍ୟାଙ୍ଗ୍ । 

ଫିଲ୍ମ ଆରମ୍ଭରେ ଦୌଡୁଥିବା ଏ କଫିନ ଗାଡିରେ ଶବ ଜାଗାରେ ଆସୁଥିଲା ଚୋରା ମଦ । ଯାଇଥାନ୍ତା ଶୋକସଭା ଗୃହକୁ । ହେଲେ ମଝିରେ ଖବର ପହଞ୍ଚିଗଲା ପୁଲିସ କାନରେ.. ଖବରି "ଦାନ୍ତଖୁଣ୍ଟା" ଚାର୍ଲି ଦ୍ୱାରା । ଯେଉଁଥିପାଇଁ ଚାଲିଥିଲା ଏ ଗୋଡ଼ାଗୋଡ଼ି ଓ ଗୁଳିଫୁଟା । 

କଫିନ ଗାଡି ଉପରେ ଆଟାକ୍ ପରେ ପୁଲିସର ନଜରରେ ଏବେ ଶୋକସଭା ଗୃହ । ଅଚାନକ ଆସି ପୁଲିସ ଚଢ଼ାଉ କରିଛି "ରାମନାମ ସତ୍ୟ ହୈ" ନାମକ ଶୋକସଭା ଗୃହ ଉପରେ । ବାହାରକୁ ଇଏ ଗୋଟେ ଶୋକସଭା ଗୃହ, ହେଲେ ଭିତରେ ଚାଲିଛି ନାଚ, ଗୀତ ଓ ମଦ ପିଆ । ମଦ ନାଁ ବି ସେଠି କଫି ଭଳିଆ । ସ୍କଚ୍ କଫି, କଳା କୁକୁର କଫି, ବୁଢା ସନ୍ନ୍ୟାସୀ କଫି, ବଣ କୁକୁଡ଼ା କଫି.. । "ବଣ କୁକୁଡ଼ା" କଫି ମଗେଇଲେ ଦୁଇଟା କପ୍ ସହ ମଦ ବୋତଲଟିଏ ଆଣି ପହଞ୍ଚାଇଦେବ ପରିବେଷଣ କରୁଥିବା ବ୍ୟକ୍ତିଟି । ମାନିବାକୁ ପଡିବ ଏମାନଙ୍କ ଉର୍ବର ବୁଦ୍ଧିକୁ ।

 

ଶୋକସଭା ଗୃହ "ରାମନାମ ସତ୍ୟ ହୈ" ରେ ଅଚାନକ ପୁଲିସ ଚଢ଼ାଉ ପରେ bar ମାଲିକ ତଥା ଡନ୍ Spats Colombo ର ମଥା ଘୁରେଇ ଯାଇଛି । ଖୋଜି ଖୋଜି ଧରିଛି ବିଭୀଷଣ "ଦାନ୍ତଖୁଣ୍ଟା" ଚାର୍ଲିକୁ । ଦାନ୍ତଖୁଣ୍ଟାର କାମ ବଢ଼େଇଲା ବେଳେ bar ର ଦୁଇଜଣ ବାଦକ (Saxophone ଓ Double Bass ବଜେଇଲା ବାଲା) ଦେଖି ଦେଇଛନ୍ତି । Spats ଏ ଦୁଇ ଜଣଙ୍କର  ଉପରକୁ ଯିବାପାଇଁ ଟିକଟ କାଟିବା ବ୍ୟବସ୍ଥା କରୁଥିଲା ବେଳେ ପହଂଚି ଯାଇଛି ପୁଲିସ । ଏ ଦୁଇ ଜଣଙ୍କ ବ୍ୟବସ୍ଥା ଆଉ କେବେ କରିବା କହି Spats ନିଜ ଗ୍ୟାଙ୍ଗ ସହ କରିଛି ସେ ଜାଗାରୁ ପଳାୟନ ।

 

Saxophone ଓ Double Bass ବଜେଇଲା ବାଲା ବାଦକ ଦୁଇ ଜଣ ହେଲେ ଫିଲ୍ମର ହିରୋ Tony Curtis ଓ Jack Lemmon । ଗ୍ୟାଙ୍ଗଷ୍ଟାର ମାନଙ୍କ କବଳରୁ ନିଜ ପ୍ରାଣ ବଞ୍ଚେଇବା ପାଇଁ ଏ ଦୁହେଁ ପରେ ନାରୀ ବେଶ ଧାରଣ କରିଛନ୍ତି ଓ ଶିକାଗୋ ଅଭିମୁଖେ ବାହାରିଥିବା ଏକ ନାରୀ ସଙ୍ଗୀତଜ୍ଞ ଦଳରେ ମିଶି ଯାଇଛନ୍ତି । ଏଇ ସଙ୍ଗୀତଜ୍ଞ ଦଳ ବା ମ୍ୟୁଜିକାଲ୍ ବ୍ୟାଣ୍ଡରେ ଅଛି ଗାୟିକା ସୁଗାର୍ କେନ୍ (ଭୂମିକାରେ Marilyn Monroe) । ସମସ୍ତେ ଟ୍ରେନରେ ଯାତ୍ରା କରିଛନ୍ତି ଶିକାଗୋ ।

 

ଫିଲ୍ମଟି ଏହାପରେ ଅନେକ ରୋଚକ ମୋଡ଼ ଦେଇ ଗତି କରିଛି । 

ଫିଲ୍ମଟି ଯଦିଓ କମେଡି ତେବେ ଅନେକ ଟ୍ଵିଷ୍ଟ ଅଛି ଫିଲ୍ମଟିରେ । ପ୍ରଥମରୁ ଶେଷ ପର୍ଯ୍ୟନ୍ତ screenplay ଓ dialogues ଏମିତି ଭାବରେ ଲେଖା ଯାଇଛି ଯେ ଦର୍ଶକ ଖାଲି ହସି ହସି ଗଡିବ । ଏହା ସହିତ ଅଭିନୟରେ ତିନି ମୁଖ୍ୟ କଳାକାର ଜବରଦସ୍ତ ଅଭିନୟ କରିଛନ୍ତି ।

Casablanca - କାସାବ୍ଳାଙ୍କା

କଣ ଏ Casablanca?

Casablanca ଆଫ୍ରିକା ମହାଦେଶରେ ଅବସ୍ଥିତ ମରକୋ ଦେଶର ଏକ ବନ୍ଦର ଭିତ୍ତିକ ସହର । 1941 ମସିହାରେ (ଦ୍ଵିତୀୟ ବିଶ୍ଵଯୁଦ୍ଧର ପ୍ରାକ-ସମୟ) ଏହା ଫ୍ରାନ୍ସର ଅଧୀନରେ ଥିଲା । ସହରଟି ଆଫ୍ରିକାରେ ଥିଲେ ମଧ୍ୟ ବେଶ ଗୁରୁତ୍ୱ ବହନ କରିଥିଲା ସେତେବେଳେ । ତାର କାରଣ ହେଲା, ୟୁରୋପ ବାସୀଙ୍କ ପାଇଁ ଏ ସହର ଥିଲା ମୁକ୍ତିର ଦ୍ୱାର । ବିଶ୍ୱଯୁଦ୍ଧର କଳା ବାଦଲ ସେତେବେଳେ ୟୁରୋପକୁ ଘେରି ସାରିଥିଲା । ଅନେକ ଲୋକ ଏ ଯୁଦ୍ଧ ପରିବେଶରୁ ବାହାରି ଆମେରିକାକୁ ଚାଲି ଯିବାକୁ ବସିଥିଲେ, ଶାନ୍ତିପୂର୍ଣ୍ଣ ଜୀବନ ବିତାଇବାକୁ । ଆମେରିକା ଯିବା ପାଇଁ ହେଲେ Casablanca ରୁ ଜଳପଥ କିମ୍ବା ବିମାନପଥ ଥିଲା ସବୁଠାରୁ ସୁବିଧା ମାଧ୍ୟମ । ତେବେ ଦେଶ ଛାଡି ଯିବା ପାଇଁ ଆବଶ୍ୟକୀୟ ଭିସା କାଗଜପତ୍ର ଯୋଗାଡ଼ କରିବା ଥିଲା ମୁଖ୍ୟ ପ୍ରତିବନ୍ଧକ । ଚୋର, ଖଣ୍ଟ, ଟାଉଟରିଆଙ୍କ ଆଡ୍ଡାସ୍ଥଳୀ ହୋଇ ସାରିଥିଲା Casablanca. ଯୋଗାଡ଼ିଆ ବା Middleman ମାନଙ୍କୁ ଧରିବାକୁ ପଡୁଥିଲା ଭିସା କାଗଜପତ୍ର ପାଇଁ । ମୋଟାମୋଟି ଉପରେ କହିବାକୁ ଗଲେ, ଏତେ ସହଜ ନଥିଲା ଏସବୁ ଯୋଗାଡ଼ କରିବା । 

ସେ ଯାହାହେଉ ଏ ଫିଲ୍ମଟି କିନ୍ତୁ ଏକ ଲଭ ଷ୍ଟୋରି । ଯେହେତୁ କାହାଣୀର ପୃଷ୍ଠଭୂମି ଏଇ ସହରରେ, ତେଣୁ ଫିଲ୍ମର ନାଁ ସହର ନାଁ କୁ ନେଇ ହୋଇଛି - Casablanca. 

କାହାଣୀ:

Casablanca ସହରରେ ଅବସ୍ଥିତ ଏକ ନାଁ କରା ପ୍ରତିଷ୍ଠିତ cafe ହେଉଛି "Rick's cafe". ସତସଙ୍ଗ ପାଇଁ Casablanca ସହରର ଲୋକମାନେ ଏଇ ଜାଗାଟିକୁ ବେଶୀ ପସନ୍ଦ କରନ୍ତି । ଫିଲ୍ମର ହିରୋ Rick ଏଇ Cafe ର ମାଲିକ । ରିକ୍ ଧନୀ, ଦେଖିବାକୁ ସୁନ୍ଦର, କିନ୍ତୁ ଅବିବାହିତ । ପ୍ରେମରେ ଧୋକା ଖାଇ ଆଉ ବିବାହ  କରିନାହାନ୍ତି ବୋଲି ତାଙ୍କ ପରିଚିତ ଲୋକେ କୁହନ୍ତି । ସହର ଭିତରେ ସମସ୍ତଙ୍କ ପସନ୍ଦଯୋଗ୍ୟ ସ୍ଥାନ ଏଇ କାଫେ । ପିଆ ପିଇ, ଜୁଆ ଖେଳ ଓ ତା ସହ Sam ଙ୍କ ପିଆନୋ ସଙ୍ଗୀତ.. ଏଠିକାର ମୁଖ୍ୟ ଆକର୍ଷଣ । 

 

ଏହି କାଫେକୁ ଦିନେ ସନ୍ଧ୍ୟାରେ ଆସିଛନ୍ତି ଚେକ୍ ଦେଶର ଜଣେ ପଳାତକ ଯୁବନେତା ଭିକ୍ଟର ଲାଜଲୋ ଓ ତାଙ୍କ ସୁନ୍ଦରିଆ ପତ୍ନୀ ଇଲସା । ଭିସା କାଗଜପତ୍ର କରେଇ ଏଠୁ ଆମେରିକା ଯିବା ପାଇଁ ପ୍ଲାନ । ହେଲେ କାଗଜପତ୍ର ପାଇଁ ଆଗରୁ ଠିକ କରାଯାଇଥିବା ଯୋଗାଡ଼ିଆ ଲୋକଟି ପୁଲିସ ହାତରେ ଧରା ପଡିଯାଇଛି । ଏବେ ପତି ପତ୍ନୀ ଅସହାୟ । Casablanca ଛାଡି ଆମେରିକା ଯିବା ପାଇଁ ଏକମାତ୍ର ଭରସା Rick’s Café.। କାରଣ ଏଇଠି ଭିସା କାଗଜ ପାଇଁ ଯୋଗାଡ଼ିଆ ମାନଙ୍କର ଭିତିରିଆ ଆଡ୍ଡା ଜମେ । ଏଣେ ପୁଲିସର ନଜରରେ ଏ ଦୁଇ ପତି, ପତ୍ନୀ । ପତି ଜଣେ ପଳାତକ ନେତା । ଏ ଦୁଇ ଜଣଙ୍କୁ ଆମେରିକା ଯିବାକୁ ନ ଦେବା ପାଇଁ ପୁଲିସକୁ ଉପରୁ ଭିତିରିଆ ଅର୍ଡର ଆସିଥାଏ । 

ଇଲସା କାଫେ ଭିତରକୁ ପଶୁ ପଶୁ ପିଆନୋ ବାଦକ Sam ଙ୍କୁ ଚିହ୍ନି ପାରିଛନ୍ତି । ସାମ୍ କିନ୍ତୁ ଇଲସାଙ୍କୁ ଚିହ୍ନିକି ବି ନଜାଣିବାର ଅଭିନୟ କରୁଥାନ୍ତି । 

 

ଏକୁଟିଆ ଦେଖି ଇଲସା Sam କୁ ପାଖକୁ ଡାକି ରିକ୍ ଏବେ କେଉଁଠି ବୋଲି ପଚାରିଲେ । ହଡ଼ବଡେଇ ଗଲେ ସାମ୍ । ସାମ୍ ରିକଙ୍କ କାଫେରେ ପିଆନୋ ବଜେଇଲେ ବି ଦୁହିଁଙ୍କ ମଧ୍ୟରେ ବହୁ ଦିନରୁ ଚିହ୍ନା ପରିଚୟ । ସେ ରିକଙ୍କର ଶୁଭାକାଂକ୍ଷୀ । 

“ମିସ୍, ଆପଣ ଏଠୁ ଚାଲି ଯାଆନ୍ତୁ ।“ 

ଇଲସା ଆଶ୍ଚର୍ଯ୍ୟ ହୋଇଗଲେ ଯେତେବେଳେ ଜାଣିବାକୁ ପାଇଲେ, ରିକ ଏ କାଫେଟିର ମାଲିକ । ଅଳ୍ପ ବାର୍ତ୍ତାଳାପ ପରେ ସାମଙ୍କୁ ସେ ଅତୀତ ଦିନର ପୁରୁଣା ଗୀତଟି ଗାଇବାକୁ ଅନୁରୋଧ କଲେ ଇଲସା ।  

“ମୁଁ ଭୁଲି ଯାଇଛି” କହି ସାମ ସେସବୁକୁ ଟାଳି ଦେବାକୁ ବସିଥିଲେ  ।

“ମୁଁ ଗୁଣୁଗୁଣେଇ ଦେଉଛି, ସାମ୍ । ଶେଷ ଥର ପାଇଁ ଗାଇ ଦିଅ । ଏମିତିରେ ଆମେ କାଲି ଭିତରେ ଏ ସହର ଛାଡି ଚାଲି ଯାଉଛୁ ।“

ସାମ୍ ରାଜି ହୋଇଛନ୍ତି ଓ ଗାଇଛନ୍ତି.. As Time Goes By. 

“And when two lovers woo,

They still say "I love you",

On that you can rely,

No matter what the future brings,

As time goes by.”

ସେଇ ସମୟରେ ହଠାତ Rick କାଫେ ଭିତରକୁ ପଶି ଆସିଛନ୍ତି । ରିକ୍ ଙ୍କର କ୍ଷତାକ୍ତ ହୃଦୟରେ ଯେମିତି ହାତ ମାରି ଦେଇଛି ସାମ୍, ଗୀତଟି ଗାଇ । ରିକ୍ ରାଗ ତମତମ ହୋଇ କହିଲେ,

“ସାମ୍, ତମକୁ ମୁଁ ମନା କରିଥିଲି ନା ? ଏ କାଫେରେ ଏ ଗୀତଟି କେବେବି ଗାଇବନି ବୋଲି ?

ସାମ୍ ନୀରବରେ ଇଲସାଙ୍କ ଆଡକୁ ଇସାରା କରି କହିଲେ, “ମାଡାମଙ୍କ ଅନୁରୋଧ ଥିଲା ।“ 

  

ରିକ୍ ଇଲସାକୁ ପୁଣିଥରେ ନିଜ ଜୀବନରେ ଦେଖି ଆଶ୍ଚର୍ଯ୍ୟ ଚକିତ ହୋଇଗଲେ । ଦଗାଦିଆ ପ୍ରେମିକା ଏତେ ବର୍ଷ ପରେ ଆଜି ପୁଣି ଥରେ ଆଖି ସାମନାରେ । ପ୍ୟାରିସରୁ କାସାବ୍ଳାଙ୍କା ।

ରିକ୍, ଇଲସାଙ୍କ ଭିତରେ କଣ ଏ love-hate ର ସମ୍ପର୍କ ? କଣ ହୋଇଥିଲା ଏ ଦୁହିଁଙ୍କ ମଧ୍ୟରେ ଏହା ପୂର୍ବରୁ? କିଏ କାହାକୁ କଣ ପାଇଁ ଧୋକା ଦେଲା? ରିକ-ଇଲସାଙ୍କ ପ୍ରେମ କାହାଣୀ ଭିତରେ ପୁଣି ଏ ଭିକ୍ଟର ଲାଜଲୋ କେମିତି ପଶି ଆସିଲେ ? ଏବେ କଣ ରିକ୍ ପ୍ରତିଶୋଧ ନେବ ନା ଇଲସା ଓ ତା ସ୍ୱାମୀକୁ Casablanca ରୁ ଆମେରିକା ଯିବା ପାଇଁ ସାହାଯ୍ୟ କରିବ ?

ଏମିତି ଅସଂଖ୍ୟ ପ୍ରଶ୍ନ । ହେଲେ ଏଇ ସବୁକୁ ନେଇ ତ ଫିଲ୍ମର ପୁରା କାହାଣୀ । ସେସବୁକୁ ଏଠି ଖୋଲିଦେଲେ ଫିଲ୍ମ ନଦେଖିଥିବା ଲୋକଙ୍କର ଫିଲ୍ମ ଦେଖିବାର ମଜା ସବୁ କିରିକିରା ହୋଇଯିବ । ତେଣୁ ଆଗକୁ ଆଉ ବଢିବାନି । 

ଫିଲ୍ମଟି କଣ ପାଇଁ Top 20 ରେ?

ସୁନ୍ଦର screenplay ଓ ଚମତ୍କାର ଅଭିନୟ । ରିକ୍ ଓ ଇଲସା ଚରିତ୍ର ଦୁହେଁ ଫିଲ୍ମରେ ଜୀବନ ଭରି ଦେଇଛନ୍ତି । ତା ସହ ପିଆନୋ ବାଦକ ସାମ୍ । 

ଫିଲ୍ମର ଡାଏଲଗ ସବୁ ଶହେ ବର୍ଷ ପରେ ବି ଆଜିଯାଏ ଚର୍ଚ୍ଚାରେ । ବ୍ଲଗ ଶେଷ କରିବା ପୂର୍ବରୁ ସେ ସଂଳାପରୁ ଦୁଇ ତିନୋଟି: 

"Play it once, Sam. For old times' sake."

(ଇଲସା ପୁରୁଣା ଗୀତଟିଏ ସାମ୍ କୁ ଗାଇବା ପାଇଁ ଅନୁରୋଧ କଲାବେଳେ)

"Here's looking at you, kid."

(ରିକ୍ ବିଦାୟ ମୁହୂର୍ତ୍ତରେ ଇଲସାକୁ  )

Nazi Major Strasse: What is your nationality?

Rick: I'm a drunkard               

(କାଫେ ଭିତରେ)

"We'll always have Paris."

(ରିକ୍ ଇଲସାକୁ ଛାଡିଲା ବେଳେ) 

         ***********