ଇରାନ ଦେଶର ଦିନକୁଦିନ ବିଗିଡି ଯାଉଥିବା ଅବସ୍ଥା ମଧ୍ୟରେ ଏକ ମଧ୍ୟବୟସ୍କ ଦମ୍ପତ୍ତି ବିବାହ ବିଚ୍ଛେଦ ପାଇଁ କୋର୍ଟରେ ଆବେଦନ କରିଛନ୍ତି । ଏହାକୁ ନେଇ A Separation ର କାହାଣୀ ଆରମ୍ଭ ହୋଇଛି ।
ସ୍ୱାମୀ ସ୍ତ୍ରୀ
ଦୁହେଁ ମଧ୍ୟବିତ୍ତ ପରିବାରର । ସ୍ୱାମୀଙ୍କ ନାଁ
ନାଦେର (Nader) ଓ ସ୍ତ୍ରୀ ସିମିନ
(Simin) । ଦୁହେଁ କର୍ମଜୀବି ଓ ଉଚ୍ଚଶିକ୍ଷିତ ।
ଦୁହିଁଙ୍କର ଏଗାର ବର୍ଷର ଝିଅଟିଏ,
Termeh ।
ଇରାନର
ସାମ୍ପ୍ରତିକ ଅବସ୍ଥା ଦେଖି ସିମିନ ଦେଶ
ଛାଡି ନିଜ ପରିବାର ସହ
ଅନ୍ୟ ଦେଶରେ ଯାଇ ରହିବାକୁ ଚାହୁଁଛନ୍ତି
। ଘରେ ଆଲଜମେର (Alzheimer's disease) ରୋଗରେ ପୀଡିତ ନାଦେରଙ୍କ ବୃଦ୍ଧ ବାପା । ଦୈନନ୍ଦିନ କାମ
ନିଜେ କରିବାକୁ ଅକ୍ଷମ । ରୋଗରେ ପଡି
ସ୍ମରଣ ଶକ୍ତି ହରେଇ ସାରିଛନ୍ତି ।
ବାପାଙ୍କୁ ଏପରି ଅବସ୍ଥାରେ ଛାଡି
ବାହାର ଦେଶରେ ଯାଇ ରହିବାକୁ ନାଦେର
ଅମଙ୍ଗ ।
ସିମିନ ଡିଭୋର୍ସ
ପାଇଁ ଫାମିଲି କୋର୍ଟରେ ଆବେଦନ କରିଛନ୍ତି । ନାଦେର କିନ୍ତୁ ଡିଭୋର୍ସ ଦେବାକୁ
ଚାହୁଁନାହାନ୍ତି । ଝିଅ ବାପାକୁ
ଛାଡିବାକୁ ନାରାଜ । ଏମିତି ପରିସ୍ଥିତିରେ
କୋର୍ଟ ସିମିନଙ୍କ ବିବାହ ବିଚ୍ଛେଦ ଆବେଦନକୁ ଖାରଜ କରିଦେଇଛି ।
ସିମିନ ରାଗରେ
ନିଜ ବାପଘରକୁ ଚାଲି ଯାଇଛନ୍ତି ।
ବୃଦ୍ଧ ଅସୁସ୍ଥ ବାପାଙ୍କ ଦେଖାରଖା ପାଇଁ ଏବେ ଜଣେ ଲୋକ ଦରକାର ।
ଜଣେ ଚାକରାଣୀ ଘରକାମ ତଥା ବୃଦ୍ଧଙ୍କ ଦେଖାରଖା
ପାଇଁ ରାଜି ହୋଇଛି ।
ଆଗକୁ
ପରିସ୍ଥିତି ଯେକୌଣସି ମଧ୍ୟବିତ୍ତ ପରିବାରର କାହାଣୀ ପରି ବଢିଛି ।
ମଧ୍ୟବିତ୍ତ ପରିବାରରେ ଗୋଟେ କଥା ଦେଖିବାକୁ
ମିଳେ । ଲୋକଙ୍କର ଆର୍ଥିକ
ଅବସ୍ଥା ଯେମିତି ବି ଥାଉ, ସେମାନଙ୍କ
ମୋରାଲ ଦିଗଟି ସାଧାରଣତଃ ବହୁତ ଉଚ୍ଚ ଥାଏ
। ବୋଧେ ଏଇଟା ସବୁ
ଦେଶ ପାଇଁ ସମାନ ।
କାହାଣୀ କିଛି ନାଟକୀୟ ମୋଡ଼
ନେଇଛି । ହେଲେ ଏସବୁ
ଭିତରେ ବାପା-ଝିଅ, ସ୍ୱାମୀ-ସ୍ତ୍ରୀ, ସମ୍ପର୍କ ଗୁଡିକ ଅତି ସୁନ୍ଦର ଭାବରେ
ଦେଖାଯାଇଛି ।
ଫିଲ୍ମଟିର
ନିର୍ଦ୍ଦେଶନା ଦିଗଟି ଏତେ ଉଚ୍ଚକୋଟିର ହୋଇଛି
ଯେ, ଦର୍ଶକ ଫିଲ୍ମର ସବୁ ଚରିତ୍ର ମାନଙ୍କ
ସହ ପୁରା ବାନ୍ଧି ହୋଇଯିବ
। ଫିଲ୍ମ ସରିଲା ବେଳକୁ ଦର୍ଶକ ନିଜେ କେତେବେଳେ ସେ
କାହାଣୀର ଅଂଶ ହୋଇଯାଇଥିବ, ନିଜେ ଜାଣିପାରି
ନଥିବ । ବୋଧେ ସେଥିପାଇଁ
ଶେଷ ଦୃଶ୍ୟରେ କୋର୍ଟ ଆଗରେ ଝିଅ ବାପା
ପାଖରେ ରହିବ କି ମା
ପାଖରେ ରହିବ, ଜଣାଇବା ପାଇଁ ଅନ୍ତିମ ନିଷ୍ପତ୍ତିକୁ
ଦର୍ଶକ ଉପରେ ଛାଡି ଦେଇଛନ୍ତି
ନିର୍ଦ୍ଦେଶକ । ଚରିତ୍ର ଗୁଡାକ
ଦର୍ଶକକୁ କେତେ ମାତ୍ରାରେ ନିଜ
ସପକ୍ଷରେ ଟାଣି ପାରିଛି, ତାହାକୁ
ନେଇ ବୋଧହୁଏ ଦର୍ଶକ ନିଜ ଅନ୍ତିମ ନିଷ୍ପତ୍ତି
ନିଜେ ନେବ ।
No comments:
Post a Comment